fbpx

First published on Facebook on Wednesday, April 8, 2009 at 3:25pm

مبارح كنت عم بحكي أنا وشريكي بالشغل…
إنّو لازم نصير دايماً نقطع لوتو…..
هوّي دغري…وافقني الرأي لأنّو شريكي….
ولأنّو صرت إفهم عليه كيف بفكّر….
وهّوي صار يفهم عليّي…..


بعد دقيقتين…..
قللّي:
“بتعرف…يمكن لازم نقطع لوتو…بسّ مشّ دايماً…
يعني بركي منصير منقطع مرّة منّي….ومرّة منّك…..
ومنتقاصم الربح إذا ربحنا…..
ومنتقاصم حقّ ورقة اللّوتو إذا ما ربحنا…..”


أنا قلتلّو :
“أوكي” ……
ووافقتو الرأي…لأنّو شريكي….
ولأنّو صرت إفهم عليه كيف بفكّر….
وهّوي صار يفهم عليّي…..


بعد دقيقتين…..
قلتلّو:
“ليك …..إذا اربحنا…شو رح تعمل بالمصريّات؟”….
قلّلي:
“باخدهن وبحطّهن بالمشروع اللّي متشاركين فيه أنا ويّاك….
لنكبّر رأسمال الشركة…ونشتغل أكتر…..”
وقلّلي كمان:
” إنت لازم تعمل نفس الشي”…..


هون أنا اطلعت فيه….
وقلتّلو:
“لأ………إذا اربحنا منتشارك سوا…
لكن بمشروع تاني جديد….بسلّي أكتر من هيدا”…..


هوّي نطر…وفكّر….
وقلّلي:
“لأ”….


أنا جاوبتو:
“مبلى”….


وقف هوّي…واحمرّ…..وعلاّ صوتو….
وقلّلي:
“قلتلّك لأ”


وقفت أنا…واحمرّيت….وعلّيت صوتي بوجّو….
وقلتلّو:
“عم قلّك مبلى”…


هون عصّب…..ورفع إيدو وضربني….
جيت أنا…..وعضّيتو بإيدو اللّي ضربني فيها…..
رجع قرّب هوّي…وحشّني بشعراتي…..وجرني…..
قمت أنا بزءت بوجّو…..


وخبصِت….وعلقِت……ودار اللّبيد…..
وكلّ هيدا….
ونحنا بعدنا لا قطعنا ورقة لوتو….ولا اربحناها…..


وهيدي مش بسّ خبريتي أنا وشريكي…..
هيدي خبريّتنا كلنا بهالبلد…


إحتراماتنا……

johnnyhage

View all posts

Add comment

Your email address will not be published. Required fields are marked *