شو حلو شارع الحمرا…لمّا بتكون ضايع بحياتك

انا حالياً إنسان ضايع…..
ضايع بحياتي….
لأنّو عم برجع نظّمها عن جديد…..
وكتيرغريب…لمّا تنظّم حياتك…..
وتكون ضايع…..

بتصير تروح عالشغل…هيدا ما في مهرب منّو…
وبعد الشغل…
إيّام بتاخد قهوة….
إيّام بتاخد مشوار لترفّه عن حالك….
إيّام بتضهر مع أصحابك الشباب….
وإيّام مع أصحابك البنات…..
وإيّام مع بنات بعد ما صارو أصحابك….
وإيام بياخد عخاطرك لأنّو الصبية اللّي بدك تضهر معها…
ما فيها تضهر معك….
أو ما بدّها تضهر معك…..

وإيّام بتِطلَع تشوف أهلك بالجبل….
وإيّام بتسطّل وبترخيها من دون ما تعمل شي….
وإيّام بتقرّر تنام بكيّر…
وإيّام ما بتنام…

إيّام بتقرّر تنضّف بيتك……
اللّي صرلك تلات اسابيع مش فايت عليه…

وإيّام بتسهر عالإنترنت وبتسردها عالفايسبوك…
أو عالويبسايت تبعولك…اللّي بعدك عم تشتغل بربّو…واللّي هلكك…

وإيّام …

وهيدي أفضل إيّام….
لمّا بتنزل عشارع الحمرا…..
وبتفوت عشي pub او cafee
(لأنّو ال pub و الcafee اللّي كنت تتسكّع فيه…سكّر)
…بتفوت عشي pub او شيcafee….
وبتبلّش تشرب…وتعق…..وتعقّ…وتعقّ….

وتتأمّل شو حلوي الحياة…..وشو حلو شارع الحمرا
لمّا بتكون ضايع بحياتك….

إحتراماتنا….