“إن كونترول”

كنت قاعد أنا ويّاها……
وفايتين بحديث شيّق وجميل…..
وعم خبّرها كيف إنّو الحياة حلوة….
وكيف إنّو لمّا الإنسان بيتخطّى المراحل الصعبة بحياتو…
بيشعر بفخر وارتياح…..

بتجي هيّي ….ما بعرف ليش…..
وما بعرف كيف…..
بتسألني……
” أيمتا بدّي إنتفلك شعرات حواجبك”.

كنت عم بشرب كاس نبيد أنا…
وهيّي ما عم تشرب…
لأنّو بدّها تضلّها محافظة عكامل وعيها…
وبدّها تضلها ” إن كونترول”….

أيمتا بدّك تنتفيلي شعرات حواجبي؟…..
العما….
إنّو بعد في حواجبي ما انتفتيلي ياهن…..

هلّق أنا بعترف إنّو شعرات حواجبي مش ولا بد….
وبعترف كمان…إنّو أنا إنسان مشعر….
وإنّو مش حلو الواحد….يكون عندو شعر….
عم يوصل حاجبو اليمين …
بحاجبو الشمال….

لكن…إذا بتريدي….
هودي حواجبي…
وأنا مبسوط فيهن….
ومرتاح….
ومش مدايقيني…
وما إلك خصّة إنتِ…

وأنا بفضّل إنّو بدل ما تحطّي مجهود ….
لتشوفي كيف بدّك تنتفيلي حواجبي….
بفضّل إنّو تشربي معي كاس نبيد….
وبفضّل كمان تضلّك “إن كونترول” عحياتك……
مش “إن كونترول” ع حواجبي…..

ولاّ قلِّك….

لشو ال” إن كونترول” من اساسها….

كاسِك…..

…إحتراماتنا….