كنت طالع إتعشّى ب فقرا

خميس الماضي…..كان صديقي عازمني عالعشا
بالشاليه عندو ب “فقرا”
لأنو هّوي كاين بأميركا…..
وراجع علبنان يفرّص لشي أسبوعين…

فعزمني عالعشا…
وكان معزوم عالعشا نفسو…
عدد من الأصحاب والأصدقاء
اللّي صرلي فترة مش شايفهن أو سامع عنّن خبر….

فكنت طالع من بيروت ومحمّس….أنا وصديقي…
وكانت الساعة 8 ونص المسا…
عالطريق…قطعنا بكذا حاجز جيش لّبناني….
كلّن عم يوقفونا…ويسألونا أسئلة ليدقّقوا معنا…..
وليحافظوا عالأمن وعسلامة المواطنين…

لمّا وصلت عفقرا….وقفت عحاجز جيش جديد….
وقفت…لكن اتفاجئت إنّو ما في جيش عالحاجز….

ييه…..

نطرت…قلت أنا بركي مشغولين الجماعة…
أو بركي الجندي المناوب…انحشر واضطر يفوت عالحمّام….
أو بركي شي تاني يعني…

نطرت…لكن ما في أثر لئلهن…..

قلت أنا بركي لأنّو العالم اللّي بفقرا كتير “كلاس” ….
بركي الحاجز كمان كتير “كلاس”….
وبركي بِسكّر بّكير مثلاً…
ويمكن….يجوز إنّو يكون بِسكرّ عال 8 يعني….

ف….غصبن عنّي كفّيت طريقي…
مع إنّو كنت جايي عبالي شوف الجندي المناوب….

وصلنا عفقرا… وفتنا عال”كلوب”…
كان في آرمات …آرمات كتيري….
اتفاجئت إنّو كلّها بالفرنساوي…مكتوب عليها “Ralentir”
وبين كل 12 آرمة “Ralentir” بتلاقي آرمة وحدة بالعربي
“خفّف سيرك”…

قلت لأنّو بركي نحنا بفقرا…كلّن الهيئة…
عم بركّوا عالفرنساوي…

بعدان شفت آرمة غريبة …. مكتوبة كمان أكيد بالفرنساوي…
مكتوب عليها “ممنوع سواقة ATV” …..

أنا معوّد عالدراجات الهوائيّة….الدرّاجات الناريّة…
بسّ الATV ؟
يعني اتخايلو كم ATV في ب فقرا…لحتّى اضطرّت البلديّة
تزرع آرمة “ممنوع سواقة ATV”

قبل ما نوصل عالشاليه دغري….
منمرّ بالقرب من “بنك عوده” داخل “الكلوب”…..
وإذ… بُسعق أنا … بنوعيّة وجمال و فخامة
ال ATM Machine اللّي مركبينها….
يعني شو ATM …أنا أكيد إنّها الأفضل مش بسّ بلبنان…
بالشرق الأوسط كمان…..

فقلّي صديقي…سبحان أللّه مزرعة كفردبيان شو صايرا حلوي….
هيدي بالزمانات كان إسمها…مزرعة كفردبيان….
اليوم….مع نتفت فرنساوي…ومصاري….وآرمات…
وATM بنك عوده……صار إسمها Faqra Club…

وفي بعض الناس بيلفظوها Club Faqgha…

إحتراماتنا…