fbpx

بلّشت أطبخ… مش من زمان
واللّي بيعرفني، بيعرف إنّي مش مارق من حدّ الطّبخ

بالعادة وين ما استأجر لإسكن بالعموم
مطاعم المنطقة، بكيّفو فيّي
كوني عايش عالتايكأوت والديليفيري
يعني بدكن تقولو الزبون المثالي بالنسبة إلن
باب رزق فاتح وما رح يتسكّر

هلّق هنّي مش عارفين إنّو أنا بلّشت أطبخ

أنا بلّشت حرتق بكم طبخة
وأصدقائي القراب ساعدوني بكم نصيحة وإرشاد
لكن وحدي من الصعبوات اللّي واجهتني
هيّ معضلة ال”حَسَب”

شو هيّ معضلة الحَسَب

بجي بسألها… قدّيش لازم أنطر لمّن حط الطبخة عنار هادية؟
بتقلّي: “حسب”
قدّيش الطبخة فيها ميّ.. وقدّيش النار هادية

برجع بجي بسألو… كونو صرلو فترة ساحب بالطبخ كمان هوّي
قدّيش بتنطر ت اللبن يتحوّل معك للبنة
بقلّي: “حسب”
حَسَب اللبن…. وقدّيش بسرعة بصفّي الميّ منّو

لاحظة أنا مُعضلة هيدي الحَسَب بالنسبة لئلي؟
طيّب وين… كيف بصرفها أنا
كيف مفروض فيّي إنّو إفهمها؟
مُعضلة لأنّو منّاش ثابتة
بتتغّير مع الحالات والجوّ العام

عم بخبّر ماما إنّو عم بلّش أطبخ
عم حاول… عم جرّب
وإنّو قريباً… رح صير أعرف أطبخ
حبّت الفكرة إمّي
سألتني، قدّيش قريباً يعني؟
قلتلها: يعني حَسَب
حَسَب قدّيش قريباً رح حلّ مُعضلة الحَسَب هيدي…

إحترماتنا

Add comment

Your email address will not be published. Required fields are marked *