fbpx

رحت عالأمن العام وقدّمت مسرحيّة….

ل نعرضها بأوّل شباط بمسرح المدينة….

رجعوا اتّصلوا الأمن العام وقالولي إنّو في كلمتين تلاتي بدّي إحزفن….

وقالولي كمان تإنزل لعندن ومعي….نسختين من النصّ المعدّل…

من بعد ما كون حذفت الكلمتين تلاتي….

وصلت لعندن…

واكتشفت إنّو معي نسخة وحدي بسّ من النصّ…

فقلت بسيطة يا صبي…

أكيد فيلو شي دكّانة أو مكتبة عندها فوتوكوبي…..

هلّق النصّ…بيطلع 30 صفحة….

وورقة الفوتوكوبي….بالأبيض والأسود….

عند معظم المحّلات بمنطقة الحمرا….

كِلفِتها 50 ليرة لبنانية ….

لقيت دكّانة….هويّ بيناتنا منّاش معروفة هيدي….

إذا دكّانة ولاّ مطبعة…

ولاّ مترجم محلّف…ولاّ معرصة…..

ولاّ ما معروف شي من شي…..

فتّ لعند الزلم…

طلعلي شبّ بالتلاتينات…

مبيّن عليه آدمي وضحوك…..

قلتلّوا بديّ صوّر 30 ورقة أبيض وأسود إذا بتريد….

قلّي وينن؟

قلتلّو…هيه يحنّي….

أخدن منّي وزتّن بهالمكنة….وبلّش يطبّع…

من باب الحشريّة جيت أنا وسألتو…

قدّيش رح بكلفوني…قال الورقة ب 500 ليرة

يعني ال30 ب 15000ل.ل

هوّي قال هيك ومتل كأنو شبقتي شي سطل ميّ مسقّع….

اركدت عالمكنة وسحبت الوراق….

وقلتلوّ وقّف يا زلمي شو عم تعمل؟ هيدي سرقة إسمها…

قلّي لاه…إنت شو عم تعمل…

قلتلّو وقّف وقّف….

قلّي طيّب كرمالك بحسبلك ياهن الورقة ب 250 ل.ل.

يعني بيطلعوا 7500 ل.ل.

فقلّتلو خلص وقف يا زلمي هيدي سرقة إسمها….

قلّي قدّيش بدّك تدفع تخمين…قلتلو بالحمرا الورقة ب 50 ليرة….

وقلّي إي يلاّ روح عالحمرا لكن…

كانت هوني المكنة طبعتلها شي 6 أوراق….

قلتلّو اتفضّل هودي 3000 حق الستّ وراق….

قام شبق الوراق بيوجّي….

وقلي ما بدّي شي منّك واحد بلا زوق….

خود وراقك واطلاع لبرّا….

وهون بلّش يتحوّل…

أنا وعم لمّ وراقي….

هوّي بلّش يتحوّل من شي بيشبه الإنسان…

 لشي تاني ما بيشبه شي أبداً….

وبلّش صوتو يعلا تدريجيّاً…

لصار بمستوى اكتر طبقة جعير ممكنة…

أنا وعم لمّ وراقي عرواء….

وبكّل برودة أعصاب…

وقلّي…..:

“لبرّا…..لبرّا…..

عم قلّك لبرّا…..عجّل….

خود وراقك واطلاع لبرّا…..عجّل….

ما تقول سرقة….ما تقول سرقة…

اطلاع لبرّا بسرعة…..حيوان…..

حيوان….حيوان…..

عجّل…اركوض….اطلاع لبرّا……”

أنا بكلّ برودة أعصاب كنت عم لمّ ورائي…

وعم بمشي عرواء لصرت برّا ….

رجع هوّي كفّا سمفونيتو برّات المحّل….عالطريق…

” حيوان….ارجاع عالحمرا….حيوان…

اطلاع لبرّا….فلّ…فلّ…

عم قلّك فلّ…..حيوان….

حيوااااااان ن ن ن ن “…..

فلّيت…

فلّيت من دون ما إحكي ولا كلمي…

وأنا قاعد عم فكّر شو صار…

وإذا الحقّ عليّي…ولاّ الحقّ عليه…

لأنّو يمكن يكون إنّو الحق علييّ بإشيا كتيري….

وحدي منّن إنّو بعدني عايش بهالبلد….

إحترماتنا….

johnnyhage

View all posts

Add comment

Your email address will not be published. Required fields are marked *

  • Kalemak durar monsieur Johnny. Bas bil nisbi la aakher saTer.. l7a22 3laiyk la annak ba3dak 3eyish bi hal balad? tab laowla hal balad, keef baddak yijeek il ilhaam ta tektob haik? laow mishi el balad mitil ma baddak (oo baddna)…3a shoo kent ya tura ra7 tektob?

  • إنت الحق عليك من الأول انك قدمت مسرحيتك للامن العام أصولاً. الله يطول عمرك يا زياد رحباني عندما قال في إحدى نهفاته الاعتيادية: في واحد عامل مسرحية عن واحد عامل مسرحية مقدمها للامن العام ومنعتا فا قامت الأمن العام منعتا. على أساس إنو الأمن العام ما بيسمح مسرحية تقول عن الامن العام إنو بيمنع مسرحية. مشان صورة الأمن العام. فا يا استاذ جوني عمول معروف ومرة الجي شو بدك بكل هل مسخرة والبهدلي هيدي وما تقدم مسرحية للامن العام من الأول. كنت وفرت عليك هل مسخرة وسمت البدن هيدي. وعلى المواطن صاحب السرقة كمين. شو يعني السارق ما عندو مشاعر؟ خدشتلو يها.

  • Kteer 7ilwi ya man…kteeeeer …. Hayda balad manno balad…..walla ya johny shi fazee3 yalli 3am biseer , l3alam sayreen bala i7ses bil marra…bala i7ses w bala zo2 wbala tirbeyi ))))….w bravo 3lek inno ba3dak 3am tiktob…kteer tamem…