fbpx

قال جايي أنا الساعة وحدي بعد نصّ ليل…

وراجع عبيتي…عأساس…..

خيّي بكون نايم…ولازم إنتبه…

تما حرتق كتير….

وقوم بالغلط وعيّيه….

راجع…وحامل شي خمس تعليقات تياب….

عليهن قمصان مكوّية…..

جايبهن معي من عند إمّي من الجبل….

فتحت باب البيت…..

ولقيتها… واقفة بوجّ الباب من جوّا….

هيدي….

صاحبتوا لخيّي….

“سعيدي”…..أنا قلتلّها……

“أهلين”…..هييّ جاوبت…..

“شو الهيئة ماشية؟”…..أنا قلتلّها….

“إي ماشية…..تأخر الوقت”…..هيّي جاوبت….

“خلّيكي شويّ” …..أنا قلتلّها….

“لأ…لازم إمشي….. تأخر الوقت”… هيّ جاوت….

رجعت هيّي فتحت الموضوع…وكمّلت….

“شو رح تكتب عال “بلوغ” اللّيلة…. “

جاوبتها أنا… “ما بعرف…بتصدقي إنّو ما بعرف…ما في شي براسي…. “

قالتلي…..

“ليش ما بتكتب…عن القمصان المغسّلين والمكويّن…

 اللّي حاملهن عضهرك….

ولاّ قلّك…ليش ما بتكتب عن البيت العايش فيه إنت وخيّك….

ليش ما بتكتب مثلاً إنّو ما في عندكن مايكرووايف…..ولا في غاز….

ليش ما بتكتب عن شريط ال”ديش” dish …اللّي قاطع بنصّ الصالون….

ليش ما بتكتب…..عن طاولة الصفرا اللّي ملياني غراض….ومش مبيّن منّها شي….

ليش ما بتكتب عن الغبرا اللّي رح بتاكلكن…وما حدا منكن داري بالموضوع…

ليش ما بتكتب عن المغسلة المسكّرة ومسدودة…والميّ واقفة فيها صرلها شي تلات إيّام….”

أللّه وكيلكن…كرجتلي ياهن وحدي ورا التاني…..

وولا حتّى أخدت  PAUSE لتتنفّس…..

  بسّ ما سكتّلها أنا……

جاوبتها…إي….قلتلها….

“ليش ما بتمشي إنتِ…..وبتشيلي هيدا الهمّ عن راسك….

عن جدّ….أنا هلّق بحكّ مخّي شويّ….وبلاقي شي إكتب عنّو….

أصلاً من بعد كلّ هالإقتراحات…

إنّو أكيد رح أطلع بشي….. “

فتّ عالأوضة…شلحت تيابي…

وزتّيتن فوق شلعت التياب المشلوحة عالأرض…

لبست البيجاما…ونمت عوجّي طبّ….

إحترماتنا….

johnnyhage

View all posts

Add comment

Leave a Reply to nermine Cancel reply

Your email address will not be published. Required fields are marked *