نحنا مبسوطين قال

في شغلة كتير مهمّة…..لازم إنّو إحكي عنّا…. لازم فتّحلكن عينيكن عليها…. مع إنّو هيّي كتير واضحة….ومبينة بوضوح ساطع…..بس ما حدا منّا قاشع…..ولا حدا داري حتّى….

نحنا مبسوطين قال…وعايشين بهالبلد….وفخورين فيه…..مع كلّ عللو…..

من زمان هيك…..

…وكلّ ما يصير عنّا نكسة أو خبطة…..منقول بسيطة، خلّينا نرجع نعمّر ونبني عن جديد….

….. وألله وكيلكن…..علقانين بهالدوّامة من زمان وجرّ.

مش منتبهين نحنا…..إنّو كل عشرة….خمستعشر سنة…منرجع لنقطة الصفر…..لنرجع نبني….لنرجع نرجع لنقطة الصفر….متل اللّي عم يلعب يويو…..

مش منتبهين نحنا….إنّو في بعض البلدان….صرلها من زمان….وما قبل قبل زمان كمان…..عم تبني….وتبني…وتبني…وتبني…

أنا حاليّاً عم زور بلد من هالبلدان…. وعم دوّر عالكلمة المناسبة اللّي بتوصف حالتي…. تخبّركن قدّيش إنّي مبهور…ومدووخ….ومسطّل بهالبلد….

مزال صرلي يومين عم فكّر وخطّط شو لازم أعمل…ووين لازم روح…تما ضيّع وقتي….

بعدني لا رحت لمحّل… ولا عملت شي حتّى…

قاعد بوجّ المجلات والجرايد والإنترنت عم خطّط وحلّل…. قد ما في محلاّت…وأماكن…..ومتاحف…..ومسارح …. ومعالم… لدرجة إنّي “ما عالم” من وين بدّي بلّش…..

ونحنا مبسوطين قال….إنّو البحر عنّا…بيبعد عن الجبل عنّا …..شي نصّ ساعة….

عفواً…البحر الملوّث عنّا….بيبعد عن الجبل الخالي من الطبيعة والشجر عنّا……شي نصّ ساعة…..

ونحنا مبسوطين إنّو عنّا متحف للشمع….ومتحف وطني…ما في ولا لبناني زايرو….أو حابب إنّو يزورو….

نحنا مبسوطين إنّو عم نتحاور…..عفواً… في كم تران قاعد عم يتحاور…. ونحنا ناطرينن…..

ولك حتّي سكّة تران ما في عنّا…..

بسّ… عنّا كم سيّارة تاكسي… ولا وحدي بتشبه التانية….وشوافير تاكسي باللألوف والالآف……كلّن بيعرفوا يزمروا… لكن ما حدا منّن بيعرف يسوق…..

وقال مبسوطين بهيك بلد……مع كلّ عللوأ…

خود بقا….أنا كتبت عن علتين تلاتي وطبّق صدري….

إحترماتنا….