fbpx

يعني… كيف هيدي الخبريّة قطعت علّيي منّيش عارف…

يمكن لأنّو أنا صرلي فترة مش عم بحضر تلفزيون…

لكن من كم يوم… خبّروني خبريّة… إي…بتفلج…

أوّل شي فكّرتها نكتة… ما صدّقتها…

لكن بعدان صدقتها …

لأنّو اعرفت إنّها جايي من لبنان…

لبنان…البلد النكتة….

دخيل عرضكن اسمعوا…

كان يا مكان…

بمنطقة بلبنان…حبس إسمو روميه…..

وبهيدا الحبس…. في محابيس….

محابيس فتح الإسلام….

هودي محابيس…كتير خطرين….

بيوم من الإيّام…بيهربو….

بعد تلاتت إشهر من ما هربوا….

إجا القوى الأمن الداخلي اللّبناني عالحبس…

كرمال ياخد واحد منن عالمحاكمة ليتحاكم…

فات عالحبس… لاقاهن هربوا….

حاااااااه ه ه ه ….

طلعت الصرخة….

ومش بسّ هيك…

اكتشفنا بعدان.. إنوّ واحد من هودي التلاتة اللّي هربو…

حرام مات بسوريّة..

هوّي وعم بحارب الجيش السوري…

ونحنا مفكرين إنّو بعدو بالحبس الزلمي…

حاااااااه ه ه ه ….

لمّا عرفوا القوى الأمنيّة …ضاعوا….

لأّنو ما عرفوا إذا هودي التلاتي عن جادّ هربوا….

أو كانو عم يلعبوا معن غمّيضة بالحبس….

حاااااااه ه ه ه ….

بعدان اكتشفنا شي جديد….

اكتشفنا….إنّو القوى الأمنيّة….

مش هنّي كانو عم بشوفو مين غايب من المساجين كلّ يوم….

لأ… كانو عم يطلبوا من المساجين…

والمساجين يجو يخبروهن إنّو ما في حدا غايب منّن….

وبهونيك يوم…

قرّروا القوى الأمنيّة يقتحموا الحبس….

إي يقتحموا الحبس؟…

فجابو 100 عنصر من الفهود…. فاتو عالمحابيس هنّي والمحابيس نايمين…

ولو ابتعرفوا شو لقيو…؟

لقيو عندن…

أدوات حديدية للضرب وسكاكين ومناشير وسواطير ومقادح ومعدّات…

بالحبس إي….

وخمسميّة جهاز خلوي….

واحزروا شو كمان؟….

لقيوا كمان….

أكثر من ثلاث شبكات انترنت داخل الحبس…

ليقدروا المساجين يتواصلو مع الخارج من خلال السكايب…

وهيدي خبريّتنا…. يا حلوين…

المغزى من القصّة…

إذا شي نهار عندك عملّية إرهابيّة بدّك تعملها…

قدّم طلب عحبس رومية…

هيك بصير فيك تعمل العمليّة من هونيك….

من دون ما حدا يدري فيك…

وبيطلعلك إنترنت… وموبايل…

ومبنى بإمّو وأبوه لتصرّف أعمالك…

وبيطلعلك شبكة عناصر إرهابيّة من فتح الإسلام ترشد وتشاركك بخبراتها….

ومش بسّ هيك…

بيطلعلك أقوى شبكة أمن ممكن تحصل عليها لتحميك…

القوى الأمنيّة اللّبنانيّة….

إحترماتنا….

johnnyhage

View all posts

Add comment

Your email address will not be published. Required fields are marked *