fbpx

قلّلو:            بدّي عروسة جبنة إذا بتريد….

جاوبو:        ع شو بدّك ياها….

قلّلو:         بديّ وحدي جبنة….ع عروس بدّي ياها….ملفوفة…

قلّلو:         فهمت فهمت…..بسّ عشو بدّك ياها….

جاوبو:      مش عشي…بدّي إحملها وإمشي…. باكلها هلّق دغري….

قلّلو:         عظيم…احملها وإمشي شو فرقاني معي أنا…..بسّ عشو بدّك ياها…..ع قشقوان….ع حلّوم…..ع مجدولة…ع عكّاوي…عكيري….عبيكون…..عشو بدّك ياها…..

جاوبو:      أه ه ه ه …هلّق فهمت عليك…..أوف ف ف ف…..عشو بدّي ياها؟……..شو بعرّفني….. شو قولك عشو بدّي ياها؟….

قللّو:        أنا شو بعرّفني…..إنت قللّي وأنا بلفّ….

جاوبو:      يلاّ إنت نقّي عنّي…عزوقك….

قلّلو:         لاه يااااااا خييّ….مش عزوقي….أنا بعملّ شو ما بدّك….عزوقك… ما تقلّلي قرّر عن حدا…..أنا كلّ ما يكون عندي خيار بين شغلتين بتللّت بضيع اللّه تبعولي…………بدّك ياني آخد قرار عنّك….. أنا قراراتي مش عارف كيف بآخدها… مرتي تركتني لأنّو ما عندي رأي قال….. عيفني خيّي عيفني دخيل عرضك….

جاوبو:      ليك ليك هالعلقة….ورك أنا جايي آخد عروس جبنة…ما كنتش ضارب حساب بدّي نقّي من عشر أصناف هلّق….بتعرف لو عارف هيك… ما كنتش جيت… ولا كنت طلبت جبنة ولا كنت عزّبت راسي….ما إلش جلادة حالي أنا اليوم….

قللّو:         طيّب شو هلّق…أيا جبنة بلفلّك…

جاوبو:      ما بعرف…بتعرف شو….بلا الجبنة….لفّلي زعتر….

قللّو:         أيوااا…..عظيم…. هيك أفضل شي….زعتر …زعتر…….أيا زعتر بلفلّك؟

جاوبو:      كيف؟

قللّو:         في زعتر بلدي…في زعتر حلبي…في زعتر جبلي….في زعتر كوري…من الكورة يعني….في زعتر العادي…ليك هودي الأنواع كلّن قدّامك….نقّي واختار….

جاوبو:      ليك ….ما تلفلّي شي…..لا زعتر ولا جبنة…أصلاً هيدا الحديث من أساسو مش عاجبني….. بخاترك…

قللّو:         أنا كمان الحديث مش عاجبني…لا عاجبني…ولا عزعتر…. أهلين…

إحترماتنا….

johnnyhage

View all posts

Add comment

Leave a Reply to nader Cancel reply

Your email address will not be published. Required fields are marked *