ليكو….شو هوّي هيدا الشي….اللّي بيفرّقنا عن الحيوانات؟…
إنّو نحنا مبسوطين بحالنا…لأنّو منفكّر يعني؟
ولأنوّ منفهم… ومنحلّل… ومنقرّر كمان؟
طيّب ليكو؟
إنّو هات اسمحولي… بدّي قارن حالي بالحيوان أنا
هنّي عايشين بغابة… وفي قسم منّن عايش بيناتنا…
نحنا عايشين بغابة متحضّرة… فيها احجار مركّبة… فوق بعضها…
هنّي في عندن قانون واحد… هوّي قانون الغاب…
نحنا عنّا ميّة ألف قانون… وكلّو مشربك بكلّوا…
هنّي بيحكوا مع بعضن بميات اللغات والحركات والتعابير المختلفة
… اللّي هنّي بيفهموها
نحنا منحكي مع بعضنا بتلات… أربع لغات… ومش عم نفهم شي عبعض
هنّي بيقتلو بعضن ليقدروا يعيشوا ويفرضوا حالن بالغابة…
نحنا كمان منقتل لنقدر نعيش ونفرض سيطرتنا بالغابة المتحضرة…
هنّي لا بيشتروا ولا ببيعوا…
ولا بيقبضوا لا بيدفعوا…
ولا بيعرفوا شو يعني مصاري حتّى…
نحنا منشتري ومنبيع ومننقبض ومندفع…
ومنصنّع ورق …
ومنسمّي مصاري….
وبيسيّرنا… وبعيّشنا…
لدرجي إنّو في عالم بتعبدو…
هنّي بيقتلو حيوانات من غير فصائل كرمال ياكلو…
نحنا منقتل بعضنا… من نفس الفصائل…
مش لناكل…
بس لنستولي عالغابة…
وعالمصاري اللّي نحنا اخترعناها…
هلّق….هنّي في عندن ربّ واحد…
نحنا في عنّا ميّة ألف ربّ… وكلّ واحد عم بشدّ التاني صوب ربّو…
هنّي بيعترفوا إننّ حيوانات…
لكن نحنا منسمّي حالنا بَشَر…
بَشَر…
منفكّر… ومنحلّل… ومنقرّر…
يمكن… صار لازم نعترف…
إنّو نحنا… أو معظمنا… أو البعض منّا…
(إنتو قرّروا)…
مش حيوانات…
اكتر من حيوانات…
ومشكلتنا الوحيدة…
هيّي إنّو منفكّر…
يعني لو ألله خلقنا بلا تفكير… كان أفضل…
كان أفضل بكتير…
إحتراماتنا…
Add comment