البيت مجوي

رحت أعملّها زيارة ببيتها
وأنا عم بجي لفوت بالباب
بتقوم بتقلّي… عفواً ما تواخذني البيت مجوي
هلّق انا بطبيعة الحال قلتلها: “بسيطة”
ولا أخدت ولا اعطيت
وفتّ لعندها

بعدان لمّا صرت جوّا
انتبهت انّو العما البيت كتير انضيف
صرت دوّر عالجَيّة عندا بالبيت
ما كنت لاقيها

فت عالحمّام… العما عم بلمّع
اتطلّعت ورا التيلفزيون
عادةً بكون في غبرة كتير هونيك
ولا نقطة غبرة

صرت عم فكّر بيني وبين حالي
إنّو إذا بيتها هيك، ومجوي
العما… كيف بكون لكان لمّن يكون انضيف؟

انا لمّن بيتي يكون نضيف
بكون مجوي أكتر من بيتها

ف…دخيل عرضِك
إذا… بحال… شي مرّة ضهرنا مع بعض
دخيل عرضِك
بترجّاكي
ما تكوني من هودي اللّي بيدّعوا إنّو بيتن مجويّ
لمّا بيتن عم شعشع نضافة عم بكون
لأنّو قلبي الصغير لا يحتمِل
بس هيك
لنكون اتنيناتنا عنفس الموجة

ولا كان فيهن يجو يصوروا دعاية مسحوق تنضيف عندا ليلتها

احترماتنا