أبيض.. أسود.. ترامب.. وكيبيك

شفتو مناصرين ترامب

اللّي هجمو عالكونغريس

وكسّرو فيه؟

هودي عالم بيض

يا ربيّ لا تجرّبنا

هودي بيعتبرو حالن 

إنّو هنّي أرقى وأعلى من غيرن من البشر

اللّي من غير ألوان 

فإذا بدكن عندهن شعطة عنصريّة

وهودي بيعتبرو إنوهنّي دايماً على حقّ

يعني لمّن نتايج الإنتخابات ما تكون عزوقن  

بينزلو وبياخدو شو بدّن بالقوّة

وبيعرفو إنّو الأمن ما رح يواجهن متل ما بواجه الناس الملونين

لأنّو الأمن عنصري متلن

وهيدي القصّة منّاش جديدة

صارت واضحة للجميع

يعني اللّي ما بيتعاطى سياسي بيعرف هيدا الشي

صارت واضحة إنّو لمّا ينزلوا العالم السود والملوّنة يتظاهروا 

الأمن بيحرق سلاّفن بالعنف والخبيط والغازات المسيّلة للدموع

وما بخلّي حدن يتنفّس

 ولمّا ينزلو البيض

الأمن بيتفرّج وبخلّيهن يسرحوا ويمرحو متل ما بدّن 

لأ… ولابسين أزياء غريبة عجيبة هالمرّة

شفتوهين إنتو؟

يعني لأوّل وهلة بيتهيألك إنّو كانو محضرين حالن مسبقاً

لأنّو ولا ممكن يلبسو هيك بالحياة الطبيعيّة

ليكو… شو لذيذين

KKKذكّروني بهودي الجماعة

هودي كمان عالم بيض

وكمان بيعتبرو حالن أفهم وأرقى من غيرن

وكمان بيعتبرو حالن دايماً معن حقّ 

إيه… هودي إسمهن Ku Klux Klan 

عتيقين

وعمرن بأميركا أكتر من 150 سنة تقريباً

إنّو شو هيدا… ما بصير الأسود والملوّن يتساوى مع الأبيض

لأنّو بالنسبة لألن الأسود والملوّن… هودي عالم ادنى وأقلّ أهميّة منّن

موجودين ليخدمو الأبيض…

لذالك… براس للكوكلاكس كلان يعني

العالم السود والملونين…  لازم يكون عندهن حدود لمطالبهن

لأزم يكون في متل إطار… متل علبة بحدّد شو بيسوا يكونو وشو لأ

لازم يتعلّبوا

وفي عندهن الحرّية المطلقة يعيشوا حياتن متل ما بدّن طالما هنّي داخل العلبة هيدي

وبعتقد إنّو كتير من هودي الجماعة

هنّي نفسن هودي الجماعة

بسّ هلّق غيّروا أزياءهن على ما يبدو

وما تفكروا إنّو أميركا كتير بتفرق عن كندا

ذات الشي

هيّي البضاعة نفسها من جوّا

لكن الكنديّة برشّوا شويّة مولتيلكولتشوريزم على وجّ الصحّارة

ليبلفونا بخبريّة إنّو كندا عندا تعددية ثقافية

لكن هيّي بالحقيقة ما عندها

خدو كيبيك مثلاً

في فوقيّة كيبيكوازيّة موجودي بكلّ شاردة وواردة

العلبة موجودة هون كمان 

وين إنت ك مغترب أو لاجىء 

فيك تبرعط بهالمرّبع

عندك الحريّة المطلقة وفرص العالم كلّها لتبرعط داخل المربّع

لكن مش خارجو

وإذا حسّيت إنّو يا جماعة

تعوا شوفوا هيدا المربّع مش سايعني

أنا عندي جوانح وفيني طير خارج المربّع

ما تعتل همّ 

بيجوا…وبقصقصولك جوانحك

لتصير تساع بقلب المرّبع

بتعرفوا الولد اللّي بالمدرسة 

اللّي عندو طاقة شويّ زيادة عن بقيّة الطلاّب

هيدا الولد اللّي ما بيشبه البقيّة

ومشروع نابغة بكون… إذا مننعطيه الأهميّة الاّزمة

ومنخلّيه يلعب خارج المربّع

بسّ لأ… ما بصير

المربّع أهم من الولد لأنّو

ومنجي منسفّ فيه حبوب أعصاب لنكويلوا الطاقة الزايدة اللّي عندو ياها

 

إي كيبيك هيك

والمربّعات اللي بحطوك فيها

عندها قوانين مش مكتوبة ولا محّل

لكن موجودة 

وكلّ العالم بتعرفها

بسّ ما حدا بيحكي فيها

العِلمات اللّي جايبهن من العالم الخارجي

ما بكفوّا هون…لازم ترجع تتعلّم عن جديد

لأنّو هون العالم أعلم

الخبرة اللّي عندك ياها من بلاد برّا 

مش نافعة كفاية… الخبرة من هون أنفع

إنت أفضلك ترجع تبلّش عن جديد هون

وإذا كنت شاطر بتطلع بسرعة

يعني شي 4 ل 5 خمس سنين من الجهد

وفيك توصل لنفس المركز اللّي كنت واصلّو 

قبل ما تجي ع هيدي البلاد

لأنّو هون أفضل

وحاول لاقي شغل خارج المربّع… يا شاطر

يا ما قبلك جربّوا

ويا ما قبلك ورجعوا متل الشاطرين عالمربّع

وعالكول سنتر وعالتيلير والرانير وعالسايلس

هيّوه المربع… فوت 

كل حدا منّو أبيض

مسموح يكون متل ما بدّو 

ضمن المربّع

برعط قدّ ما بدّك

وبالفرنسي

وبيطلعلك هيداك المغترب التاني

اللّي ما عندو مشكلة مع شي

وبيجي بقلّك… إذا بتريد ما تنقّ

أصلاً إنت لازم تشكر ربّك إنّو خلّّوك

 تجي وتبرعط ببلادن

وإذا مش عاجبك فل

ّ

شو بيجي عبالي قلوّ

لا مش عاجبني

ومش رح فلّ

رح ضلّ

ورح اشتغل إنّو غيّر هيدي الوضع

وصير برعط مطرح ما أنا بدّي 

خارج المربّع

وهيه

بسّ ما بقلّو شي

إحترماتنا