fbpx

عفواً مش عارف كيف بدّي قلّك ياها
عم بحكي ومواخذ نفسي يعني
إنّو مين أنا ﻹحكي…. وشو فهّمني
بسّ إنّو باﻷمليّة إذا بتسمعني بكون ممنونك

يمكن… إذا بدّك تظبّط البلد… اه ه ه … عم نحكي عن تغيير
إي إنّو في تغيير بدّو يصير
عالقليلة عالقليلة بدّك تغيّر شي واحد

ولا ممكن يصير تغيير بلا ما يتغيّر شي… عرفت كيف
وضروري هيدا الشي اللّي بدّك تغيّرو… يكون شي مش ظابط
لحتّى لمّن يتغيّر يصفّي ظابط
مشكلة إذا سائبت وجيت لاسمحالله غيّرت شي ظابط
بتكون عم ترجع لورا

بدّك تغيّير شي مش ظابط… ليظبط

لمّن يكون في عندك زعيم مسؤول
صرلو 28 سنة بالحكم
وبهال 28 سنة تبيّن إنّو كلّ السياسات اللّي تحنّن علينا فيها
طلعت… كيف بدّي قلّك… مش ظابطة
أنا برأيي مش لازم تغيّر سياسات بقا
إي بدّك تغيّير المسؤول

لمّن يكون عندك مسؤول تاني
صرلو 10 سنين محمّس كيف إنّو بدو اصلاح وتغيير
وبدّو يعمل السبعة ودمّتها لمّن يجي عالحكم
ولمّن إجا عالحكم
بعدو لا في إصلاح ولا اتغيير
وبركي لازم نصلّح الوضع ونغيرو مثلاً
بركي هيدا الزلمي مش ظابط
وبركي أصلاً لمّن كان بزمناتو ظابط… يعيطولو ظابط يعني
كمان ما كان ظابط
لأنّو يجوز يكون ظابط بالإسم… لكن مش ظابطة معو
بركي ﻷنّو في شي بالمؤسسة العسكريّة نفسها مش ظابط مثلاً

لمّن يكون عندك زعيم مسؤول
استقال من منصبه ﻷنّو منّوش مسؤول
ويجي يطلعلك بخبريّة إنّو إذا بترجع بتجيبني مسؤول.. رح ظبّط البلد
كيف بدّي قلّك… هيدا عم يبلفك
هيدا ما همّو البلد… هيدا همّو زعامة البلد

هلّق وفي عندك هيدا الزعيم
اللّي صرلو أكتر من تلاتين سنة بدّو يحرّر فلسطين
و”مش طالع عبالو” يعطي الفلسطيني حقّو كإنسان بالبلد اللّي هوّي حاكمو
ﻷنّو هوّي طالع بإيدو… بسّ مش طالع عبالو
حلو بكون إذا بتتحرّر فلسطين… وضروري
بس العمليّة هيئتها مطولة شويّ
بركي بهالوقت بتعطي الفلسطيني اللّي خلق بلبنان، وكبر بلبنان، وربي بلبنان
لأنّو هيدي لبنان إذا حبّيت تعترف في لأو لأ… ه,ّي لبناني مفروض يكون
بركي بتعطيه حقوقو كأنسان
هيك بصير في يحرّر فلسطين معك… ونفسيتو مرتاحة
عرفت كيف؟…

هودي اللّي عدّيتهن… وعندك متلن كم زعيم جايين من تاريخ اقطاعي وطائفي… وفاشي
لمّن البلد “ما” يكون ماشي ع حساباتن بيلعنو سلاّفو.. ولمّن يكون ماشي عاحساباتن… بصير الوضع رواء وما في شي
هودي كامشين البلد عخوانيقو
وكامشين زعما الطوايف… وكامشين القضاء الحر
أهلين

إي هودي… ما فيك تفكّر تظبّط الوضع يا تقبرني إنت
بلا ما تدقّ فيهن
ﻷنّو تأكد إنّو أوّل ما تجي بدّك تظبّط… رح هنّي يدقّوا فيك
فالتنفغة هوني إنّو تدقّ فيهن قبل ما هنّي يدقوّا فيك
اعرفت كيف؟

إي روح لقلّك…يا شاطر
ودقّ فيهن
إذا فيك

احترماتنا

Add comment

Your email address will not be published. Required fields are marked *